Навіны Навіны Беларусі

Беларусь павінна выйсці з вайсковых блокаў і вывесці замежныя вайсковыя аб’екты

Беларусь павінна выйсці з вайсковых блокаў і вывесці замежныя вайсковыя аб’екты

3775 Праглядаў Мінск
Рух «За Свабоду» распачаў абмеркаванне праграмнага дакумента арганізацыі па нацыянальнай бяспецы. Сярод прапановаў выхад з усіх ваенных блокаў і вывад з тэрыторыі Беларусі замежных вайсковых аб’ектаў, прывядзенне войска да стандартаў НАТО і істотнае павялічэнне яго фінансавання, увядзенне мяжы з Расіяй.

Праграму рэформы галіны прадставіў сябрам Руху аналітык праекту Belarus Security Blog Зміцер Міцкевіч.

«На дадзены момант напружанне ў рэгіёне Усходняй Еўропы ўзрасло да даўно нябачанага ўзроўню. Дзве суседнія з Беларуссю краіны фактычна знаходзяцца ў стане вайны. Пры такіх умовах і агрэсіўнай палітыцы Расійскай Федэрацыі складана прадказваць далейшае развіццё падзей нават у кароткатэрміновай перспектыве», — адзначыў эксперт.

У такіх умовах, лічыць ён, ад Беларусі патрабуецца хутка рэагаваць на любыя пагрозы, якія ўзнікаюць ва ўсіх сферах нацыянальнай бяспекі і патрэбная сучасная і гнуткая сістэма нацыянальнай бяспекі.

Сярод ягоных прапановаў, якія ў далейшым будуць больш шырока абмяркоўвацца ў арганізацыі і зацвярджацца радай у якасці праграмнага дакумента: забеспячэнне нейтральнасці дзяржавы (адпаведна выйсце з усіх вайсковых блокаў, усталяванне поўнавартнаснай мяжы з Расіяй), прывядзенне войска да стандартаў НАТО і істотнае павялічэнне яго фінансавання (да 2% ВУП), захаванне прызыву ў войска, усталяванне за ім грамадскага кантролю, змяненне карэнным чынам ідэалагічнай базы пры падрыхтоўцы вайскоўцаў і г.д.

«Падзеі апошніх гадоў дэманструюць беларускаму грамадству што да пытанняў нацыянальнай бяспекі трэба ставіцца на поўным сур’ёзе. Наяўнасць міжнародных дамоваў ці ўдзел у блоках з краінамі, якія называюць сябе тваімі саюзнікамі яшчэ не гарантуе ад найгоршага сцэнарыя развіцця падзеяў», — падвёў вынікі круглага стала старшыня Руху «За Свабоду» Юрый Губарэвіч.

Па ягоных словах, Беларусь, якая паслядоўна адмаўлялася ад супрацоўніцтва з дэмакратычнымі еўрапейскімі краінамі, рызыкуе застацца сам насам са сваімі праблемамі ў выпадку ваеннай агрэсіі супраць яе. «У гэтай сітуацыі трэба вялікую ўвагу надзяляць баяздольнасці беларускага войска, перагледзіць падыходы да выбару саюзнікаў, памятаць, што жаданне бараніць сваю зямлю можа быць толькі ў тых, хто любіць і шануе сваю краіну», — заключыў Губарэвіч.

Аўтар: Вольга Быкоўская

Каментары наведвальнікаў

Імя: не абавязкова
E-mail: не абавязкова
Каментар:
    спіс каментароў пусты

Апошнія навіны