«Суддзя прыняў рашэнне пакараць Дзмітрыя да 10 сутак арышту. Я размаўляў з ім пасля гэтага, кажа, абвінавацілі ў непадпарадкаванні міліцыі за тое, што ён не адчыніў дзверы супрацоўнікам у цывільным», — сказаў сайту Pyx.by Турчаняк.

Каардынатар Руху па Брэсту лічыць сітуацыю абсурднай. «Форма стасункаў з міліцыяй не павінна быць у кватэры грамадзяніна. Гарбунову павінны былі ўручыць позву», — дадаў Дзяніс Турчаняк.

«Мы былі ў кватэры, калі пад’ехалі 2-3 машыны, там супрацоўнікі ў цывільным. Адзін падняўся да кватэры, сказаў, што ён участковы. Я свайго ўчастковага добра ведаю, і гэта быў не ён. Сказаў, што мае пытанні пра падзеі, якія адбыліся за дзень да таго. Якія падзеі, не ведаю, я не бачыў учора ніякіх падзеяў, сказаў я», — распавёў напярэдадні сайту Pyx.by Дзмітрый Гарбуноў.

Па ягоных словах, пасля гэтага (у кватэры быў грамадскі актывіст Аляксандр Кабанаў) запыталіся, ці выйдзе ён, ці будзе чакаць. Яны вырашылі абраць другі варыянт.

«Праз 2 гадзіны вырашылі выйсці, быў поўны пад’езд АМАПу. Да нас ветліва паставіліся, дайшлі да белага „ўазіка“. Потым малодшы камандзір АМАПу паведаміў, што яны прыйшлі, каб зламаць дзверы. Мы нечакана выйшлі, і яны разгубіліся. 3 гадзіны шукалі, што нам прад’явіць і знайшлі: непадпарадкаванне мне, і арганізацыя несанкцыяванага мерапрыемства і непадпарадкаванне — Кабанаву», — сказаў блогер.

Ён не браўся прадказаць рашэнне суда, але аказалася, што суддзя абярэ варыянт арышту — 10 сутак Дзмітрыю Гарбунову і 11 сутак — Аляксандру Кабанаву.