Навіны Навіны Руху

Падказкі мінскім уладам

Падказкі мінскім уладам

3662 праглядаў Мінск
Рух «За Свабоду» накіраваў у Мінскі гарвыканкам шэраг прапановаў дзеля паляпшэння гарадскога жыцця. Яны былі складзены па выніках адмысловага круглага стала «Народнай праграмы» — ініцыятывы Руху па выпрацоўцы планаў рэформаў у розных галінах.

Сфармуляваныя на гэтым круглым стале прапановы па зменах у самых розных сферах жыццядзейнасці Мінска сталі адказам на заяву старшыні Мінгарвыканкаму Андрэя Шорца. Заступіўшы на гэтую пасаду пры канцы мінулага году, у звароце да жыхароў сталіцы ён сказаў: «Мы гатовыя разгледзець любыя прапановы, якія зробяць горад больш прыгожым, больш багатым і камфортным».

Удзел у круглым стале «Народная праграма» для Мінска" узялі эканаміст Зміцер Бабіцкі (які займаецца пытаннямі транспарту і лагістыкі), лідар ініцыятывы «Еўрапейская перспектыва» Віктар Янчурэвіч (вырашэнне лакальных праблем у горадзе), старшыня Беларускага добраахвотнага таварыства аховы помнікаў гісторыі і культуры Антон Астаповіч (захаванне гістарычнай спадчыны), былы дэпутат Палаты прадстаўнікоў Уладзімір Навасяд (ЖКГ і абарона правоў спажыўцоў), стрыт-арт-актывіст Алег Ларычаў (мастацкія акцыі і гарадская прастора).

Першы намеснік Руху «За Свабоду» Юрась Губарэвіч кажа, што ў Мінгарвыканкам днямі накіравана першая частка распрацаваных прапановаў.

Напрыклад, прапануецца прыцягнуць да адказнасці вінаватых у незаконным будаўніцтве гатэля «Кэмпінскі». «Абавязковай умовай узвядзення аб’екта з’яўлялася аднаўленне гістарычнага помніка — электрастанцыі на новым месцы. Аднак захаваць паспелі толькі галоўны фасад, потым паступіла ўказанне знасіць. Зараз мы рыхтуем матэрыялы справы, адным з фігурантам якой будзе былы старшыня Мінгарвыканкаму Мікалай Ладуцька», — патлумачыў на круглым стале Антон Астаповіч.

Яшчэ што да архітэктуры і будаўніцтва мінскім уладам прапануецца вярнуцца да распрацаванага некалькі год таму праекта рэгенерацыі гістарычнага цэнтра горада. Напрыклад, гаворка вядзецца пра ўладкаванне пешаходнай зоны на вуліцах Рэвалюцыйная і Камсамольская і стварэнне падземнага паркінгу на 600 машын пад Кастрычніцкай плошчай.

Сярод іншых прапановаў «Народнай праграмы» для Мінска«:

— Каб забяспечыць большую прывабнасць грамадскага транспарту, неабходна павялічыць ягоную сярэднюю хуткасць хаця б да 25 км/г праз вылучэнне асобных палос

— Больш шырока выкарыстоўваць электронныя табло на прыпынках грамадскага транспарту, якія павінны паказваць рэальны, а не паводле графіку часавы інтэрвал руху

— Стварыць агульны рэестр плошчаў Мінска, якія не выкарыстоўваюцца і могуць быць аддадзеныя пад разнастайныя формы гарадской актыўнасці

— Уважаць за вырашальнае меркаванне жыхароў горада ў справе прыняцця рашэнняў па рэзанансных і правакуючых сацыяльную напружанасць праектах. Дыялогавай пляцоўкай можа стаць Грамадска-кансультатыўная рада пры Мінгарвыканкаме.

Каментары наведвальнікаў

Імя: не абавязкова
E-mail: не абавязкова
Каментар:
    спіс каментароў пусты

Апошнія навіны